Spassegiond tras streglias stretgas tier il chisti – la tuor da habitar medievala dils signurs da Lumerins – e las loschas casas dils «Franzos da Lumbrein», intervegnin nus dapli dallas tradiziuns religiusas. Silsuenter va ei vinavon tochen il vegl santeri dalla pestilenza sper la caplutta da sogn Roc. Da leu anora gudin nus ina bellezia survesta e scuvrin el lontan la culegna Crestaulta che datescha dil temps da bronz. Returnond tras il vitg visitein nus la baselgia barocca da sogn Martin. Alla fin dalla tura contemplein nus ils terments cristagls dil Péz Regina. Dapi la stad 2023 ei la cristalla imposanta - "sulegl dil Péz Regina" e "steila dils quater vents" puspei exponida en lur patria.