Tgi ei mira!cultura?
Davos mira!cultura stat ina gruppa da persunalitads dalla Surselva che s'interessescha per la historia, la cultura e la veta da mintgadi hodierna ella vallada e che ha plascher da dar vinavon sia savida als indigens ed als hosps en ina moda e maniera diverteivla. L'iniziativa va anavos sin igl onn 2015, cura ch'il Museum Regiunal Surselva ha publicau per l'emprema ga ensemen cun il Museum Meister da Vuorz ina scolaziun alla guida da cultura resp. al guid da cultura. Persunas dil fatg renconuschidas han silsuenter scolau en in cuors intensiv e duront duas excursiuns las 20 persunas ch'eran s'annunziadas. La finamira dil cuors ei stada da realisar a moda autonoma ina viseta guidada da 90 minutas tenor agen accent tematic ed interess persunal. Suenter ina viseta guidada d'emprova ed in resun dallas collegas e dils collegas ha l'emprema annada da guidas e guids da mira!cultura retschiert il diplom. Dapi lu ha mira!cultura aunc organisau dus ulteriurs cuors, il davos 2019 en cooperaziun cun il precuors «Bündner Guide» a Cuera.
mira!cultura – ina marca da tetg per purschidas culturalas
Il num «mira!cultura» vul dir ton sco: «Mira, cheu capeta cultura!». Suenter la scolaziun ein las guidas ed ils guids e la purschida dallas visetas guidadas vegnidas sut tetg tier mira!cultura. El Museum Regiunal Surselva han ins endrizzau in post d'administraziun che pren encunter ils giavischs dalla clientella, dat tips per programs dil di e coordinescha las visetas guidadas. Gia la stad 2015 ha Surselva Turissem integrau visetas guidadas dil vitg da mira!cultura el program per ils hosps. E mintg'onn vegnan vitier visetas guidadas en novas vischnauncas. 2020 han ins fundau cun l'Associaziun dils museums ed archivs culturals Surselva (AMAS) ina nova e ferma uniun purtadra per mira!cultura. Ils museums ed archivs culturals dalla Surselva ein ina basa cumpetenta per las occurrenzas da mira!cultura. AMAS surpren naven digl 1. da schaner 2021 la direcziun da mira!cultura ed aschia era il svilup da novas purschidas, la scolaziun ed il perfecziunament sco era la controlla da qualitad.
Il team actual
Oz lavura in team da 16 guidas e guids cun gronda passiun per mira!cultura. El s'entaupa regularmein per brattar experientschas e seperfecziunar. Las guidas ed ils guids arvan als hosps da vacanzas, allas gruppas da viadi ed als indigens ina porta en temps vargai, lain denton era far part els dallas atgnas historias dalla veta e dallas experientschas dil mintgadi hodiernas. Intermediar il lungatg e la cultura romontscha, quei stat fetg a cor allas guidas ed als guids. Las visetas guidadas vegnan purschidas en romontsch, tudestg, franzos, talian, engles e danes.
Reservaziuns per gruppas e mira!cultura el program per ils hosps
Il post d'administraziun da mira!cultura coordinescha las damondas da gruppas. La menadra dil post, Paula Bundi, fa las reservaziuns per gruppas e gida la clientella sin giavisch era a concepir in program dil di individual.
Tgei purschidas per gruppas dat ei?
Cheu anfleis Vus tut las informaziuns per gruppas.
L'organisaziun turistica Surselva Turissem ei responsabla per las purschidas da mira!cultura el program per ils hosps. Las occurrenzas han liug duront las vacanzas d'unviern, da stad e d'atun. Sche Vus vuleis saver, cura e nua ch'ei marscha enzatgei en Surselva, consultei l'agenda sin nossa pagina-web ni las plattaformas digitalas da Surselva Turissem.
Tgei marscha il mument?
mira!cultura PLUS el rom dalla NPR
Da 2017 entochen 2020 ha mira!cultura astgau realisar el rom dalla nova politica regiunala (NPR) il project mira!cultura PLUS, e quei cun il sustegn digl Uffeci per economia e turissem dil Grischun e digl Agid svizzer per la muntogna. Igl intent da quel ei stau da promover ina stretga cooperaziun dallas casas da cultura participadas a mira!cultura e dalla Surselva Turissem SA sco partenaria da project, cun la finamira d'augmentar marcantamein il diember da participontas e participonts e dallas reservaziuns da gruppas.
Plinavon ha il project giu la finamira da concepir in management da qualitad cun ina scolaziun ed in perfecziunament cuntinuau dallas guidas e dils guids sco era da documentar las visetas guidadas e la savida fundada sin ina plattaforma online accessibla a tut las guidas ed a tut ils guids. Las visetas da menaschis da producents locals e da beins purils ein in ulteriur resultat da mira!cultura PLUS.
Menau il project ha lic. fil. Marianne Fischbacher, etnologa e specialista da turissem diplomada, formatura da carschi FSFC.